सादर नमस्कार।

पाल्पाली समाज युएईसँग मेरो सम्बन्ध समाजको स्थापना कालदेखि नै गहिरो रूपमा जोडिएको छ। सुरुदेखि नै म तन, मन र सक्दो धनको साथमा समाजलाई अगाडि बढाउने यात्रामा समर्पित छु। समय, श्रम र विचारको निरन्तर योगदानमार्फत म सधैं यही सोचमा लागिरहेँ—“समाजलाई अझ सशक्त, उत्तरदायी र सबैका लागि समर्पित कसरी बनाउने?”

२०२०–२०२४ कार्यकालमा कोषाध्यक्षको जिम्मेवारी सम्हाल्दै संस्थाको आर्थिक पारदर्शिता र सुशासनलाई मजबुत पार्न सकिएको अनुभवले आज मलाई अझ सजग, जिम्मेवार र प्रतिबद्ध बनाएको छ। यही विश्वास र साथका आधारमा २०२५–२०२७ कार्यकालमा पुनः सोही जिम्मेवारी पाउनुलाई म व्यक्तिगत सम्मान मात्र नभई समाजप्रतिको सामूहिक विश्वासका रूपमा लिएको छु।

कोषाध्यक्षको भूमिकामा मेरो मूल लक्ष्य भनेको—संस्थाको पारदर्शी आर्थिक व्यवस्थापन, सदस्यहरूसँग विश्वासिलो संवाद, र सामाजिक, शैक्षिक तथा मानवीय अभियानहरूमा निरन्तर सहयोग पुर्‍याउनु हो।

समाज भनेको केवल संस्थागत संरचना होइन, यो हाम्रो आत्मीयता, सहकार्य र साझा पहिचानको प्रतिबिम्ब हो। त्यसैले, म सबै दाजुभाइ तथा दिदीबहिनीहरूमा हार्दिक आग्रह गर्दछु—हामी सबै मिलेर सशक्त, पारदर्शी र सेवामूलक समाज निर्माण गरौं। तपाईंहरूको सुझाव, सहयोग र सहभागिता नै समाजको शक्ति हो।

धन्यवाद।